विडा

विडा प्रितीचा बनवला राजसा तुमच्यासाठी

या मंचकी बसा खेटून जवळी भरवण्यासाठी ॥ धृ. ॥

एका एका वर ठेवले दोन

पान हिरवे कंच ss

देठ खुडला चिमण्या दाती

शेंडा लाविले नख ss

गाली हसले आठवणीने रातच्यासाठी ॥ १ ॥

चूना प्रेमाने लावला अलगद

कात करडा रंग ss

खांड सुपारी आवडे तुम्हा

कतरता अडकीत्ता दंग ss

पापणी लवते वरखाली आगमनासाठी ॥ २ ॥

गुलकंद थोडा असा चोळला

बोटाचा दरवळे सुगंध ss

गुलाबी दाणं अलगद सोडलं

शिरशिरत बघा अंग ss

खुलली रात्र आज पुन्हा चांदण्यासाठी ॥ ३ ॥

गुंडाळला विडा असा

टोचली कांडी काळी लवंग ss 

चेरी लाली ओठी पानी

तयार झाली संग ss

यावे खुशाल आता दाणं टिपण्यासाठी ॥ ४ ॥