वारं सुसाट

वारं सुसाट भिंगूळ

तार झडीची लागली

उठवणी आल्यागत

हाडं मोडू मोडू आली

फांद्याफांद्यात सैराट

झाड पिसाटलं दिसं

खोडा-मुळांत गोठलं

एक बधितसं पिसं

किरकिटी दात घेत

पोर उपाशी निजलं

सटवाईनं कपाळी

तसं असंल लिव्हलं

राडा चिखलमातीचा

भवताली पसरला

त्यात गडपला काटा

पायापायात घुसला

बैलखुरांत चिखल्या

हैरानली जितराबं

आता कवा कसं बापा!

शिवार ह्ये राही उभं?

वढा समींदर जाला

प्याया पानी कुटं शोधू ;

चुलखंड थंड जालं

पोटासाठी कसं रांधू?