चित्र कालचे

आभाळाची अमृमाया

रानवनांना भिजवत होती

खळाळपात्रामधुन नितळता

मुक्तपणाने वाहत होती

टच्च टपोरा कणीसदाणा

उभी शिवारे पिकवित होती

पोटभरीचा घास त्यातुनी

खिलारवाडे वेचत होती

झगझगत्या किरणांतुन वारा

प्राण जागवित विहरत होता

उसगोडवा माणुसकीचा

पुरे बाळसे धरून होता

कालचक्र फिरणारे गरगर

नियमगतीचे बांधिल होते

वृक्षवेलिच्या पानांमधुनी

केतकचांदण निथळत होते

'सहनाववतू 'चे वास्तव

संस्कृतीत भरलेले होते

उभे ताठ ज्ञानाचे डोंगर

पिढ्यापिढ्यांना घडवित होते