वारा

फिरून फिरून दमल्यावर

विसावलो एका झाडावर 

पण त्याचीही हालली पाने 

अन् पुन्हा एकदा 

वाहू लागलो मी वेगाने 

क्षणभर एका घरात शिरता 

चिडली मजवर दारे-खिडक्या 

थडथडती त्या अति रागाने 

अन् पुन्हा एकदा 

वाहू लागलो मी वेगाने 

सागर शैयी निजू पाहता 

त्याची लगबग सुरूच झाली 

कर लाटेचे उठले क्रोधाने 

अन् पुन्हा एकदा 

वाहू लागलो मी वेगाने 

डोंगरमाथी जाऊन जेव्हा 

साथ तयाची मागत होतो 

मजला लोटी तो त्वेषाने 

अन् पुन्हा एकदा 

वाहू लागलो मी वेगाने 

थकून पाय ओढीत होतो 

हताश झालो त्या खेदाने 

अन् तेव्हा मजला 

रोखून धरले त्या मेघाने

वाहू न शकलो मी वेगाने