परिक्रमा

सोनसावळ्या त्या लालीचा

मळवट भरुनी भाळी

आरक्त केशरी तेजस्वी ते

कुंकू कोरीव लावी

तिन्ही सांजेचे शृंगारातून

रूप मनोहर फुललेले

सांग कुणाच्या भेटीसाठी

मन हे आसुसलेले

पश्चिमेच्या नयनामध्ये

काळोखाने काजळ भरले

अन् क्षितीजाच्या बाहूने

हळूच तिजला कवेत धरले

क्षणात सारे मळवट कुंकू

पश्चिम क्षितिजी पसरे

मनास आपुल्या भावून जाते

रूप सांजेचे बुजरे

पुन्हा नव्याने वधू नाहली

तेच मळवट कुंकू ल्याली

पश्चिमेच्या क्षितिजासाठी

परिक्रमा ही करू लागली