तू
तू
तू चाहूल चांदरातीची
तू उधळण स्वच्छंद प्रितीची
तू मुक्या शब्दांची साद
तू गीतास हवासा नाद
तू सुगंध स्मरण सुमनांचा
तू अबोल बोलकी वाचा
तू नजरेत गोठता पाऊस
तू या जन्मीची अपुरी हौस
तू मोह वेड्या मनाचा
तू सूर्य नव्या दिनाचा
तू नक्षत्र आठव तारकांचे
तू ठिकाण हळव्या स्मारकांचे
तू देहास बिलगता वारा
तू स्पंदनांची निरंतर धारा
तू प्रश्न बिन उत्तराचा
तू स्पर्श जणू अत्तराचा
तू स्वर्ग जसा भुईवर
तू मुकुट जसा डोईवर
तू थेंब मुखावर रुळणारा
तू अर्थ मलाच कळणारा
तू नजर माझ्या नजरेतली
तू गुंफण जणू गजऱ्यातली
तू खवळत्या सागरास किनारा
तू सरितेची सांधण तो झरा
तू माझ्यापासून माझ्यातले अंतर
तू हृदयावर कोरलेले अदृश्य अक्षर
तू भावनांचे विस्तृत पंख
तू काळजात सलता एक डंख
तू आयुष्याच्या आरंभीचा शंख
तू हृदयाचे ठोके असंख्य
तू दोर अश्रूंचे मोती विणनारा
तूच बंध मला बांधणारा