तों पाऊस

आठवता पुन्हा । थरकाप होतो । 

उभा तों राहतो । तों पाऊस ॥ १॥

एकटाच होतो । जीर्ण झोपडीत । 

तेव्हा पडवीत । झोपलेलो ॥ २॥

किर्रर्र होती रात्र । गडगडे नभी। 

सौदामिनी उभी । चमकत ॥३॥

मनसोक्त तेव्हा । कोसळले मेघ । 

काळजात रेघ । काळजीची ॥ ४॥

अश्या त्या रात्रीच्या । पावसाची ओल । 

पोहचली खोल । काळजात ॥५॥

वाहूनिया गेले । रात्री माझे गाव । 

राहिले ते नाव । मात्र मागे ॥ ६॥

असा तों पाऊस । विसरू मी कसा । 

तों राक्षस जसा । अवकाळी ॥ ७॥

येऊ नये कधी । पाऊस तों पुन्हा । 

वाहू नये पुन्हा । झोपडी ती ॥ ८॥