तलवारीची धार...

न झाला न होणार 
असा साहित्यकार,
साहित्य माझ्या अण्णांचं
गाजतंया जगभर
अण्णा भाऊंच्या लेखणीला 
आहे तलवारीची धार...

जे भोगलं, अनुभवलं
तेच त्यांनी लिहिलं,
वास्तव ते लेखन
जगाला भावलं,
दिला शोषीतांना न्याय
केला अन्यायावर वार...

दुःख, दैन्य, दारिद्रय
जीनं मन हेलावणारे,
सत्य साहित्यात मांडणारे 
ठरले अण्णा भाऊ खरे
पेटविली मशाल
बहुजनांचा हुंकार...

कल्पनेच्या पंखांनी
नाही घेतली भरारी,
जगात गाजली ती
अण्णा भाऊंची कादंबरी,
जगी आश्चर्य मोठं
न शिकता साहित्यकार...

अण्णा भाऊंनी दिला
जगाला फकिरा,
लखाकला जगी
हा साहित्य हिरा,
दिले बळ आम्हा
केला अनिष्ठतेवर प्रहार...

करून शाहिरी
केले समाजप्रबोधन,
खळवळे रक्त
पाहून शोषण
कष्टावर तरली धरती
क्रांतिकारी हा विचार...

रशियात उभे
पुतळे अण्णा भाऊंचे,
जगभर अनुवादित
साहित्य त्यांचे,
चित्रपट गाजले
अण्णांच्या साहित्यावर...

गायकवाड आर.जी.
दापकेकर जि.नांदेड
9834298315