तिनं फक्त कुढायचं

लहानपणापासून दुजाभाव

एवढंच तिनं बघायचं,

मिळेल ते स्वीकारत तरीही

आनंदानं हसत 'ति'नं फक्त कुढायचं...||१||

हक्काचं सोडून परक्याचं घर

आपलंसं करण्यासाठी रात्रंदिन राबायचं,

प्रत्येकाचं हवं नको सांभाळताना

मन मारून जगायचं

'ति'नं फक्त कुढायचं...||२||

येईल आपलाही एक दिवस कधीतरी

भाबड्या आशेवर जगायचं,

मान-अपमान सहन करत

'त्या'च्या आनंदासाठी जगायचं

पण कळतं जेंव्हा वेड्या मनाला

'तो' ही त्यांचाच आहे

'ति'नं फक्त कुढायचं...||३||

कुटुंबाच्या अस्तित्वातच 

आपलं अस्तित्व पहायचं,

स्वतःची अस्मिता कधी कळलीच नाही

जमेल तिथं आणि जमेल तसं फक्त राबायचं

'ति'न फक्त कुढायचं...||४||

आपलं कुणी नसलं तरी

आपण मात्र सर्वांचं व्हायचं,

संस्काराची शिदोरी जपत

प्रत्येक ठिकाणी झुकायचं

'ति'नं फक्त कुढायचं...||५||

नका धरू गृहीत 'ति' ला

'ती' सुद्धा माणूस आहे,

मन,भावना,इच्छा,अपेक्षा

'ति'ला ही आहेत

'ति'ला फक्त शब्दांचा आधार हवा

तू कुढायचं नाही तर लढायचं...||६||