किलबिल

कुठे गेला तो किलबिलाट

का मित्रांचा डाव मोडला?

का कोरोनाने चिमणीपाखरांच्या

खेळ जीवाशी मांडला?...||१||

बागेतील किलबिलाटाने

मन कसे प्रसन्न होते,

सुन्न झाले सारे आता

आवाजाविना मुके झाले...||२||

नाही कुणाचे डिवचणे येथे

नाही कसले भांडण,

कुठेच नाही ढकलाढकली

नुसतेच रिकामे जाणे...||३||

रंगविल्या भिंती जरी

डोळ्याची उत्सुकता नाही,

"बाला"ने शाळा नटली

तरी पहायला बालक नाही...||४||

कश्याला नुसत्या बोलक्या भिंती?

बोलणेच इथे नाही,

कुणास बोलावे इथे

कळेना कुणा काही...||५||

जातील हेही दिवस

उगवेल सूर्य आशेचा,

उजळतील दाहीदिशा

तेजस्वी किरणांनी उषेच्या...||६||