Library
सवय
सवय
सवयी बऱ्याच असतात
काही चांगल्या काही वाईट परंतु चांगल्या सवयी नेहमी अंगीकाराव्या असो परिस्थिती कितीही बिकट वा नीट
सवय असावी
आयुष्यातील सुखदुःखाचे क्षण
ह्रदयाच्या कप्पात साठवून ठेवण्याची आणि त्या आठवणींना आपलंसं करून जगण्याची
सवय असावी
येणाऱ्या प्रत्येक क्षणांना हसत सामोरे जाण्याची आयुष्याचा प्रत्येक खेळ सामंजस्याने खेळण्याची
सवय असावी
मनाच्या भिंतीला कुठेतरी अलगत सावरण्याची
मोडले असता कितीदा तरी पुन्हा नव्या उमेदीने लढण्याची
सवय असावी
कधीतरी गर्दीविना एकांतात रमण्याची
समोरच्यांच्या दुःखावर कधीतरी हळूवार फुंकर मारून नात्यातील ऋणानुबंध अलगदपणे जपण्याची
सवय असावी
स्वप्नांच्या जगात हरवतांना
कधीतरी स्वतःला सावरून बघण्याची
मनातल्या अबोल भावनांना कधीतरी शब्दात मांडायची
सवय असावी
सुखाचे क्षण अनुभवताना कधी
दुःखाचे ओझे वाहून बघण्याची
प्रेमाची अपेक्षा कुणाकडून ठेवतांना
कधी दुसऱ्यांनाही प्रेम वाटून बघायची
सवय असावी
कधीतरी हक्काने हाक देण्याची
निसटल्या शब्दांना,
तुटलेल्या मनांना,
दुरावलेल्या नात्याला,
हरवलेल्या प्रेमाला
नव्याने पुन्हा रेशीम बंधात जोडण्याची
परंतु ...
अट्टाहास करू नये असा की
ज्याची सवय होऊन जावी
त्यातून बाहेर पडण्यासाठी मग सारी ऊर्जा नष्ट व्हावी
बेधुंद व्हावे असेही एकदा की स्वप्नांची या पाखरे व्हावी
मुक्त जगावे असेही एकदा की
जीवनाला ह्या आपलीच सवय होऊन जावी...🙏😊
