लाइब्रेरी
प्रोफाइल
श्रावण-आपल्या आतला
श्रावण-आपल्या आतला
1 min
64
भिरभिर गाणे गाते कोणी
सूर पाहता ठाव नसे
अंतरात डोकावून पाहता
मैफिल सारी तिथे दिसे
अवाक् होऊनी पाहता
कोडे उलगडते अलवार
आला आला ऋतुराज
माझा श्रावण सुकुमार
केशरी प्राजक्त सड्यांनी
मग गंधित होते अंगण
हळूच हसते ऊन कोवळे
जणू सोनियाचे शिंपण
शृंगार सजले अवघे जग
नैराश्याचा सुटे विळखा
सोहळ्यांनी भरले मन
सणांचा श्रावण सखा
झिमझिम पाऊस गात्रातला
पापणीत कधी उतरतो
रिमझिम ऊब सर्वांगाला
सार्थकाचे ऊन पेरतो
सुखउन्ही नि दुःखसरी
चराचर अवघा नाहतो
ऊन-पावसाचा लपंडाव
श्रावण लपेटून घेतो
