शोध

शोध घे ललने स्वतःचा

नाही कुठेच तू कमी

नको व्यर्थ न्यूनगंड

बाळगूस तू मनी

विचार आपुल्या अंतरा

केलीस ना कर्तव्यपूर्ती?

क्षेत्र प्रत्येकाचे वेगळे

करी पूर्तता यथाशक्ती

कुणी संसार सांभाळे

सर्वां आपुले म्हणूनी

काम हीच कर्मभूमी

कुणी नका लेखू कमी

कुणी व्यस्त नोकरीत

संसारही सांभाळिते

बरोबरीने कमवूनी

संसाररथ चालविते

झेप घेतली गगनी

क्षणार्धात अंतराळी

पराक्रमी असे नारी

जरी असे लेकुरवाळी

रणांगणी वीरबाला

पराक्रम गाजवती

संरक्षण भारताचे

स्वबळावर करती

समानतेच्याही पुढे

रथ गेला ओलांडूनी

शोध मनासी ललने

कुठले क्षेत्र तुजवाचूनी?