सारीपाट

जीवनाच्या सारीपटावर

कधी हार तर लाभे जीत

खिलाडूपणा बाणव मनी

महत्वाचे जाण मनमीत

प्रारब्धाप्रमाणे सुखदुःख

जगतनियंता सर्वां देतो

कधी शिडीने यश अर्पितो

सर्पगिळंकृत खाली आणतो

जीवनात साधना अनेक

कष्टप्रयत्नाने साध्य होती

कधी आघाडी कधी पिछाडी

पात्रता नित सिद्ध करती

कधी मित्र पैल यशोतीरी

मान मोद सखया तयात

नको तुलना नकोच ईर्षा

मर्म खेळाचे जाण मनात

कोणी होई सर्पगिळंकृत

साथ तयाला मृदु शब्दांची

हात तुझा देईल तयाला

उभारी झणी पुढे जाण्याची

जीवनसार खूपच सोपे

मिळेल तेवढे घे मनुजा

घेई आनंदकंद भरुनी

सुखदुःखांची नकोच तमा