रेशमी सरी

सावळे सावळे मेघ

 रेशमी सरींनी बरसले

थेंब हिरव्या पानांवर

कसे ओळीने बसले||१||

नखशिखांत भिजली भुई

मृदगंध दरवळे

डोंगरातून वाहे नदी

जाऊन सागरास मिळे||२||

धुके विणले आभाळाने

अदृश्य झाडवेली झाले

 जणू डोंगराने त्या

अंगी भस्म फासले||३||

ओल्या ऊन-पावसाने

इंद्रधनु साकारला

मनमोहक मयूराचा

पिसारा सुंदर फुलला||४||

गवताची पोपटी पाती

 वाऱ्यासंगे डोलतात

 नाजुकशी रानफुलं 

 हिरवळीत शोभतात||५||

 सूर्यही भिजला जणू

त्याची आगही विझली

 प्रसन्नता शांत शीतल

 सृष्टीसंगे मनं मोहरली||६||