पोरके प्रश्नं

आली अशी वेळ |प्रश्नचि ठाकले॥

आभाळ झाकले I समस्यांनी ॥

धनाच्या तिजोऱ्या | असे ज्याचे पाशी ॥

समाजाच्या राशी Iतो न येई ॥

न राहे छदाम I त्याचे मोठे मनं ॥

रिकामे दुकान I वाटायाशी ॥

पायाने लंगडा I पैजेसाठी झुरे ॥

आळदांड मरे I आळसाने ॥

विहिरी आटल्या | रान उजाडले ॥

लावे ना झाडे I तरी सुद्धा ॥

नसे भुतदया | धोंड्याला दे मान ॥

पुण्यासाठी दान I मंदीराशी ॥

कोणी केले देवा I असे जात धर्म ॥

कर्मची सद्धर्म Iसांगा येगा ॥

वृद्ध आईबाप । वृद्धाश्रमी टाके ॥

गोष्टी मोठ्या फाके I भाषणात ॥

नार करतसे Iलंगोटीचा वेष ॥

नका देऊ दोष I फॅशन ही ॥

वाड वडीलाशी I नसे मानधान ॥

लावितो लगन | एकलाचि ॥

उरले न जुने | प्रेमाचे निवाडे ॥

कोर्टाचे कवाडे I व्यर्थ व्यय ॥

शेतकरी बाप I रडतो ऋणापायी ॥

पुढाऱ्याची घाई I मतासाठी ॥

सांग विठुराया | किती प्रश्नं मांडू ॥

घेऊन ये दांडू I चमत्कारी ॥