निसर्ग कविता

  धुंद सारी सृष्टी झाली

  जादूकांडी फिरवली,

  स्वप्नवत वाटणारी

  रूप नवे जणू ल्याली..

  मन प्रसन्न होऊनी

  हिरवळ धुंद करी,

  थेंब टपोरे संगती

  आल्या पावसाच्या सरी..

  पशु-पक्षी गुंजारती

  प्रसन्नता भोवताली,

  डोलणारी सृष्टी अशी

  गुज खोली मनातली...

  सारे क्षण सुखमय

  तन-मन सारे वाहू,

  अंगोअंगी रोमांचक

  साज निसर्गाचा पाहू..

  सरीतून हर्षगीत

  धुंद होऊन आळवू,

   पावसाच्या थेंबातून

   स्वप्न यशस्वी साठवू...