मला आवडतो पाऊस
मला आवडतो पाऊस
मला आवडतो पाऊस खूप
तन नि मन चिंब भिजवणारा |
प्रियकराच्या आठवणीत त्याच्या
प्रेयसीला नकळत खिजवणारा | |१| |
पाऊस घामेजल्या अंगाचा दाह
कमी करून शीतलता देणारा |
मृद्गंधाची फवारणी करत सर्वांना
प्रसन्नतेने जिंकून घेणारा | |२| |
पाऊस शेतकऱ्यांना सुखावह
शेतीसाठी वरदान ठरणारा |
तृषार्त चातकाची मनसोक्तपणे
तहान भागवून धरणं भरणारा | |३| |
मला आवडतो पाऊस धरतीला
गर्द हिरवा शालू प्रदान करणारा |
मोराला नृत्यासाठी प्रेरणादायक
मेघांना नभी थोपवून धरणारा | |४| |
मला आवडतो पाऊस अगदीच
सानथोरांनाही नादी लावणारा |
अवखळ बालपणीचा सखा बनून
सखीच्या पाठीमागे धावणारा | |५| |
कागदी नावा सोडायला पाऊस
यावा अंगणात तळी साचवणारा |
येरे येरे पावसा गाणी म्हणतांना
लहानग्यांना हर्षाने नाचवणारा | |६| |
पाऊस सा-यांनाच आवडतो पण या कवितेतून व्यक्त केलेलं पाऊस प्रेम तुम्हाला आवडता का त्यासाठीच वाचा ही कविता!