माझे अबोल गाणे

हे शब्द हाय माझे, झाले कसे विराणे

देऊ कसे तुला मी, माझे अबोल गाणे

व्हावे असेच काही, एकांत हा सरावा

शिशिरात या तनाला, ना सह्य हा दुरावा

घेऊन ये वसंता, काही नवे बहाणे

देऊ कसे तुला मी, माझे अबोल गाणे

तो कृष्ण जीवनी ना, राधेस त्या मिळाला

रांझेस शोधताना, तो हीरही जळाला

या काचखेळण्यांचे, आम्ही तरी दिवाणे

देऊ कसे तुला मी, माझे अबोल गाणे

बेधुंद रात्र सरता , उरलेच काय हाती

डोळ्यांत आसवांनी, केली उगाच दाटी

स्पर्शात बोल आता, झाले पुरे पहाणे

देऊ कसे तुला मी, माझे अबोल गाणे