माहेरची ओढ

ओढ जायला माहेरा 

लागे मायेच्या सागरा ,

खोली प्रेमाचा पदर 

डोळ्यातलं पाणी सारं ...||धृ||

वेडी ही पाऊलवाट 

पानांचा सळसळाट ,

सारे देई मला हाक 

भारी माहेरचं सुख ....||१||

फुले मोहोर आंब्याचा 

गंध दाटला चाफ्याचा ,

राघू - मैना बोले कानी 

अन् तुळसी अंगणी ....||२||

आई - दादा वाट पाही 

दादा वहिनीची घाई ,

उभे सारेच दारात 

माझी वाट पाहतात ....||३||

कधी येईल माहेरी 

छकुली लाडकी भारी ,

किती जीव लावतात 

सुख मावेना मनात ....||४||

चाहूल सणासुदीची 

स्वारी ती भाऊरायाची ,

येईल उद्या सासरी 

हळवं मन सावरी ....||५||