*बापाचं प्रेम*

बाप छत घराचं, अन घराचा आधार ,

त्याच्याविना नाही चाले , चाले हा संसार ..||धृ||

बाप छत घराचं........

सुख देउनी घराला , घेई दुःख डोंगराचे ,

देई हसू आपल्याला , ओढे ओझे संसाराचे ,

दुःख मनामध्ये जरी , फोडी हास्याचा पाझर ,

दाखवी आनंद , तरी कसा चेहऱ्यावर ..||१||

बाप छत घराचं.....

राब राब रात्रंदिन , काम करी वणवण ,

प्रेम जरी डोळ्याआड , लपे अश्रुही अजाण ,

नाही डोळ्यांना दिसे , पण जीव लावी फार , 

मनी प्रेम असे , त्याचे साऱ्या कुटुंबावर ..||२||

बाप छत घराचं.......

लेकी लाडक्या- बापाच्या , त्यांना जपे फुलावाणी ,

शिकवूनी - सावरूनी , वाढवी त्यांना प्रेमानी ,

येई पाणी डोळ्यांतून , लेकी सासरी गेल्यावर ,

होई आभाळ ठेंगणे , लेकी खूप शिकल्यावर ..||३||

बाप छत घराचं......

लेक मोठा झाला आता , त्याच्या चेहऱ्यात पाही ,

माझ्याहूनही हो मोठा , एवढंच स्वप्न राही ,

उर भरून येई , लेक मोठा झाल्यावर,

मन फुलून जाई , त्यानं नाव कमवल्यावर ..||४||

बाप छत घराचं ........