कर्तृत्ववान नारी

कधी नाही घेतले पाटी-पुस्तक

कधी नाही घेतले हाती कलम

तिच्या कर्तृत्वापुढे झुकतो आलम

दोन दशके करून बहू परिश्रम

मनगटात एकवटून सारे बळ

आयुष्याचा पालटला खेळ

स्वहिंमतीने बदलली वेळ

मनातील आकांक्षेचे मिळाले फळ

अकोले-कोळंभणे गावातील

एक गरीब आदिवासी माता

कर्तृत्ववान महिलांच्या यादीत

तिने स्थान मिळवले आता

निसर्गाकडून मिळाले होते शहाणपण

हाताशी होती फक्त कोरडवाहू जमीन

पिकेल की नाही देता येत नसे हमी

ज्ञान-संस्काराची जराही नव्हती कमी

जतन करून देशी बियाणांचे वाण

झाला पद्मश्री पुरस्काराने सन्मान

बीजमाता राहीबाई पोपेरे यांना

आता देश-विदेशात असे मान

ना पैशाची हाव, ना प्रसिद्धीची

कर्तव्यापुढे रास पडली पुरस्कारांची

फाटकाच संसार आपला सावरत आहे

बियाण्यांची बॅंक साऱ्यांना आवडत आहे

सलाम तिच्या कर्तृत्वाला-सादगीला

सलाम तिच्या संग्रही-संशोधन वृत्तीला

आरोग्य रक्षणासाठी-सुदृढतेसाठी

जगाला एक नवा मंत्र दाविला