खेळ बुद्धिबळाचा

राजा मी बुद्धिबळाचा

राज्य माझे चौकतीचे

आठ प्यादे, हत्ती, घोडे

सैन्य शोभते उंटांचे

एक चाणाक्ष वजीर

असे सदा उभा सज्ज

काळ ठरे शत्रूसाठी

राहे निश्चिंत हे राज्य

प्रतिस्पर्धी दोन राजे

लढवय्ये वजीर ते

होई जीत एकाची नि

दुसऱ्याची हार होते

शत्रूराजा करी हल्ला

होते वैरीण ती रात

राजा जरी असलो मी

मिळे मला , शह , मात

जन्म अपुला साऱ्यांचा

बुद्धिबळाचाच खेळ

जरी जिंकलो हरलो

सुखी व्हावे सर्व वेळ.