जागर माणुसकीच्या

ऐक माणसा आता जाग जरासा

माणूस जीवनाचा नाही भरोसा

कोण आपला कोण पराया

जो तो लागे स्वतः पोट भराया

नाही संकटी कोणी आडोसा

माणूस जीवनाचा नाही भरोसा

चुकणार नाही हा मृत्यू अटळ

चालत नाही तिथं पैसा न बळ

आपलेच कर्म सांगे जो तो आरसा

माणूस जीवनाचा नाही भरोसा

कुठला धर्म आणि कुठल्या जाती

मातीचा हा देह त्याची होते माती

गरीब श्रीमंत सोड बदल फारसा

माणूस जीवनाचा नाही भरोसा

जो तो मिरवतो आपलीच शान

नात्यागोत्याला नाही कुठले भान

छळ कपटाचा आता सोड तमाशा

माणूस जीवनाचा नाही भरोसा

माणुसकीचा रे करू या जागर

जोडुनी मन सारे बनू भवसागर

 एकसंघ राहू एकच आशा

माणूस जीवनाचा नाही भरोसा

दुष्काळ प्रलय महामारी युद्ध

माणूस लढतो माणूसकी विरुद्ध

स्वार्थ सोडुनी घे भरारी आकाशा

माणूस जीवनाचा नाही भरोसा