ग्रामपंचायत निवडणुका

ग्रामपंचायत निवडणूका म्हणजे

लोकशाहीच्या हृदयाचा ठेका;

गावोगावी -गल्लोगल्ली असतो

नात्या-गोत्यांपासून धोका.

भावाविरुद्ध भाऊ बापाविरुद्ध

उभा पोरगा असतो ;

पैसा-प्रतिष्ठा-खुर्चीसाठी

हवा तो तोडगा असतो.

गावातील गल्लीबोळात

होते घराघरांची फाळणी;

राग, द्वेष, प्रेम, मत्सराची

माणसांमाणसात फोडणी.

शेजाऱ्याला शेजाऱ्याचा कट्टर

विरोधक मानले जाते;

तर कधीकधी कट्टर विरोधकांशी

स्नेहबंध विणले जाते.

रम-रमा-रमीच्या स्पर्शाने

लागते निवडणुकीला वळण ;

एकेका मतासाठी उमेदवारांची

मतदारांच्या पायावर लोळण.

ग्रामपंचायत निवडणुकीनंतर

गावागावात होते रणकंदन ;

लोकशाहीच्या मूल्ये-तत्वांना

दुरून बेगडी वंदन.

ग्रामपंचायत ते संसद

सर्वत्र "सेम टू सेम" आहे;

सगळ्यांकडून केला जाणारा

लोकशाहीचा गेम आहे.