Library
गोडपरी
गोडपरी
सोनपरी म्हणू
की नीलपरी
घरी माझ्या आली
गोबऱ्या गालांची गोड परी
चांदण्यांनी सजलेला
सुंदर तिचा झगा
लखलख करती
चांदण्या बघा
चंद्र तिचा दोस्त
हळूच खुणावे
ताऱ्यांसोबत खेळायला
आम्हाला बोलवे
परीने सांगितली
इच्छा मागायला
खुश मी तुझ्यावर
काय देऊ तुला
कर सगळ्यांना सुखी
नको डोळा पाणी
सगळीकडे समाधान असावे
मुखी आनंदगाणी
कोणी उपाशी झोपू नये
असावे कपडे अंग झाकायला
सर्वांनी मिळून राहावे
समृद्ध कर देशाला
परी म्हणाली मला
हे तर सगळे तुम्हीच करू शकता
एकमेकांचा आदर करा
दुस्वास का करता
माणूस म्हणून जागा
नको फाजील गोष्टी
अविचारी महत्त्वकांक्षा
ठरेल सगळी खोटी
परीचे म्हणणे
मला जाम पटले
हे सारे ऐकून
मी डोळे मिटले
प्रकाशझोताने उघडले डोळे
परी होत होती अदृश्य
तिच्या चेहऱ्यावर समाधान
दिसत होती ती खूश
हातात माझ्या ठेवली
तिने चांदणी एक
आठवण ठेव माझी
पुन्हा नक्की भेट
अचानक झाली गडबड
पडले बेडवरुन खाली
आवाज ऐकून
आई धावत आली
होते सारे स्वप्न
सारे उलगडले
अंमलात आणूया
जे परीने सांगितले
