घर प्रेमाचं
घर प्रेमाचं
1 min
154
आई बाबांबरोबर
घर हसरं असतं
खेळ गप्पागोष्टींसवे
गोड बाल्य फुलतं
माया प्रेमाचा उबारा
घर आपल्याला देतं
संकटात कसोशीने
संरक्षण छत्र देतं
नभ विस्तीर्ण दिसतं
आकाशात पहाताना
झेप घेताच घरटं
दिसे लहान होताना
दूरवर गेल्यावर
कळे किंमत घराची
ओढ मायेच्या बोलांची
घट्ट मिठी जाणिवांची
कुणी पाखरु परते
ओढ लागता घराची
कुणी मात्र तिकडेच
खंत करी घरच्यांची
घर उभंच असतं
सर्वांसाठी कायमचं
माया प्रेमाच्या छायेला
डोईवर धरायचं