भारतीय नारी

नारी शक्ती

भारतीय नारी शक्ती

उजळते सारे विश्व

कर्तृत्वाच्या थोरवीने

दौडविती सप्त अश्व ||१||

एक कल्पना आकाशी

कोलंबिया नासातून

ठरे हिंद सौदामिनी

विश्वव्यापी नभातून ||२||

धुरा कन्या शिक्षणाची

क्रांतीज्योत पेटवून

झाल्या विभूषित स्त्रिया

सावित्रीच्या कुशीतून ||३||

समाजाची कन्या सिंधू

स्वावलंबी स्वयंपूर्णा

अनाथांची हीच माता

मूर्तिमंत अन्नपूर्णा ||४||

धन्य धन्य जिजाबाई

शिव प्रेरणेची खाण

शिवशाही वीर माता

हेच स्वराज्य निशाण ||५||

असे चतुरस्त्र भान

नाव ते मणिकर्णिका

भवानीचे रूप जणू

भासे शत्रूस कालिका ||६||

सत्यमेव जयतेचे

चाले कायम धोरण

अन्यायाला फोडे वाचा

स्त्री तेजाची ती किरण ||७||

किती आल्या किती गेल्या

जगी झाल्या या महान

यांच्या तेजापुढे झाले

तारे नभाचे लहान ||८||