परीराणी (बालगीत)

परीराणी परीराणी

कशी दिसे छान छान

चंद्रावाणी मुखडा गं

तुझा गोरा गोरा पान ||१||

स्वप्नामध्ये आली माझ्या

घरी चांदण्याची परी

ताज चंद्राचा तो शिरी

पंख चमचम करी ||२||

पंखावर बसवून

तिने नेले तारांगणी

गोल मटोल चांदोबा

हसे नाचे नभांगणी ||३||

लपाछपी, गप्पाटप्पा

आकाशात ताऱ्यासंगे

लपे कसा हा चांदोबा

लिंबोणीच्या झाडामागे ||४||

चांदण्यात संथ वारा

गाई गोड गोड गाणी

चांदोबाच्या झोपाळ्यात

जोजविते परीराणी ||५||

इटुकला जीव माझा

गेला दमुन खेळून

घरी आणले स्वप्नात

पंखावर बसवून ||६||