उजेड पेरु

(अष्टाक्षरी)

चला उजेड हा पेरु

विजयाचा तेजोमय

दिवा लावूनिया जगी

होई जसा सुर्योदय||१||

ज्योत निघे रात्रीतून

लढे अदृश्य शत्रुशी

बळ दाखवी एकीचे

नाते हे मानवतेशी||२||

जीर्ण वस्त्र टाकूनिया

सोडी जीणे लाचारीचे

तोडू आता कंबरडे

भ्रष्टाचार, अन्यायाचे||३||

दिवा पेटवू ज्ञानाचा

अज्ञानाच्या अंधारात

तेव्हा होईल सज्ञान

साक्षरता समाजात||४||

पुण्य शिकवू दानाचे

करुनिया रक्तदान

धरु सत्याचीच कास

मिळे त्यास सर्व मान||५||

दान द्यावे गजानना

सकलास आरोग्याचे

दूर करी अंध:कार

ध्येय पूर्ण जीवनाचे||६||