पैसा

देवा तुझ्या दरबारी

पाप पुण्या मिळे ठाव

तिथे होई मोजमाप

रंक असो कोणी राव ||१||

पृथ्वीवर पैशालाच

मानतात सारे देव

पैसा हा सर्वस्व जगी

मिळे पैशालाच भाव ||२||

सारी नाचते जनता

पैशाचाच तालावर

त्याचेच रे गाणे आहे

सर्वांच्याच ओठावर ||३||

पैशापुढे माणुसकी

येथे ही कवडीमोल

सर्वजण फिरतात

त्याच्यासाठी गोल गोल ||४||

घ्यावी लागते काळजी

नातीगोती जपताना

अनुभव येई महा

दूर आपले जाताना ||५||

चार भिंतीत जगता

न्याय विके बाजारात

मोठी ताकद पैशाची

अन्याय हा चव्हाट्यात ||६||

पैशामुळे शेतकरी

होतो हा कर्जबाजारी 

निराशेच्या त्या छायेत

गळा अडकवी दोरी ||७||

मोठा यायचा पाऊस 

जेव्हा पैसा होता खोटा

मागे पाऊस ही नोटा

नाही पैशाला या तोटा ||८||

नको दिमाख पैशाचा

नाशवंत हा पैसाच

नाही कळत जन का

मानती देव यालाच ? ||९||