अजिंक्य

अजिंक्य

रोज जातो तो कामाला

विझवाया आग पोटाची,

नाही चांदण्यांची स्वप्न

साधीसुधी राहणी त्याची ॥१॥

ना कधी मागितला चंद्र

भाकरीच्या चंद्रातच सुख,

पगारासाठी होता उशिर

लागते त्याला रूखरूख ॥२॥

'जिंकणे' हेच शब्दकोशात

नेहमीच तो जिंकत आला,

खिलाडूपणा बाणवून अंगी

लढावयास सज्ज झाला ॥३॥

मांडताना डाव जीवनाचा

मोडक्या संसारात रमला,

नऊ ते सहा वेळ पाळत

रात्री शांत झोपेत नीजला ॥४॥

जरी काही चिरडली स्वप्ने

चालताना हा मार्ग सरळ,

सदैव राहिला ताठ कणा

समाधानाने भरली ओंजळ ॥५॥