अभंग

जीवा लागे ध्यास । पांडुरंग आस

चाले पदन्यास । पंढरीसी

विठ्ठलाच्या भेटी । कैवल्याची ताटी

पंढरीच्या वाटी । वारकरी

श्रद्धा ,भक्ती, दान । त्रिवेणी संगम

आषाढी हंगाम । एकादशी

नसे भेदभाव । जातपात धर्म

एकजूट कर्म । समभाव

वैष्णव पताका । पुंडलिक हाती

जोडूनिया नाती । सकळिक

मुखी हरीनाम । सोबतीला राम

मोहमाया , काम । सांडूनिया

भक्त मांदियाळी । बांधूनिया चाळ

अश्वारूढ बाळ । ज्ञानेश्वर

वहिवाट जुनी । माऊलींच्या भेटी

संताची रहाटी । जागोजागी

इंद्रायणी तटी । देवाची नगरी

पुण्यांच्या डगरी । चढियेल्या

नाम्याची पायरी । चरणाची धूळ

मिटवितो शूळ । पदस्पर्श

कळसी बसला । बघा तो सावळा

पाहतो सोहळा । आपुलाचं