अभंग

जाणा वेळ काळ । मग कुटा टाळ

तुम्ही हो वाचाळ । शांत रहा

दिस नाही बरे । व्यर्थ नको जिव्हा

चालवूस भावा । ऐक जरा

इखाची पेरणी । शब्दांची करणी 

नको ती भरणी । टकुळ्यात

पक्ष आणि झेंडे । कशास मिरवी

तिरंगा थोरवी । ठेव ध्यानी

निरर्थक गप्पा । करितो नेत्यांच्या

बघ तू स्वतःच्या । योगदाना

उचलली जीभ । लावितोस टाळ्या

बऱ्या नव्हे खेळ्या । या घडीला

ऐवढे का सोपे । देशाचे दायित्व

निभावणे सत्व । कठीण रे

कशापायी बोल । लावितो तू वेड्या

बुध्दीच्या तोकड्या । ठेव भान 

द्वेष तिरस्कार । तूझा रे पोकळ

बिषारी मोहोळ । आगडोंब

तू जप स्वतःला । होईल अनर्थ

सांडू नको व्यर्थ । बोल खोटे

धुरंधर पार्थ ।आहे एकजूट 

तुझी काथ्याकूट । वेगळीचं 

अती तिथे माती । म्हणं ठेव ध्यानी

देशापेक्षा कोणी । मोठा नाही

मिनू म्हणे देवा । क्षमा कर त्यांना

परिस्थिती ज्यांना । समजेना