🍁 आयुष्याच्या शर्यतीत 🍁

आयुष्याच्या शर्यतीत

खडतर त्या प्रवाह वाटा... 

पोलादासम धैर्यशील मनाला

खंबीरतेचा टोचावा काटा... 

ओझं आयुष्याचं चालतांना

असंख्य ती वळणे अनोळखी... 

नं थकता चालायचं अविरत

करून खडतर वळणांशी ओळखी... 

कठोर क्षणातील अनुभवांचे

ओढे अंतरी साठवताना... 

अवखळ ती होऊन सरिता अल्लड

बागडायचे आहे मला लहरतांना... 

आकाशाशी लावून पैज

दु:खाचा डोंगर करावा सर... 

संकटाच्या वादळांचे कांकण सोडून 

निर्धाराला आवळायचे करकचून वर...  

सपशेल हरलेल्या युद्धाला

आत्मविश्वासाने जिंकायचे... 

परिस्थितीचे वार झेलून छातीवर

एका योद्ध्यासम चिकाटीने लढायचे...