आठवण

अंतराने फक्त दूर जातेस

आठवणीचे रावे देऊन

मला सोबत नेतेस तुझ्या

स्वतःला माझ्यात ठेवून

बोटांवर निसटतासा स्पर्श देऊन

ओठांवर सोबतीची गाणी ठेवून

ओंजळ माझी प्रेमानी भरतेस

मनाच्या गाभाऱ्यात आठवणी तेवून

श्वासात माझ्या दरवळ देऊन

सर्वांगावर तुझा स्पर्श ठेवून

सतत माझ्यात जाणवत असतेस

नजरेला असीम स्वप्न देऊन

खूप साऱ्या आठवणींनी

डोळे जेव्हा पाणावतात

तू पुन्हा पुन्हा मला जाणवतेस

माझ्यात माझीच होऊन

©® निशा काळे