“കൗൺസിലിങ് ഡെമോ”

മീരയുടെയും ശരത്തിന്ടെയും പ്രണയം പോലെ എന്നൊരു വാമൊഴി തന്നെയുണ്ടായിരുന്നു കോളേജിൽ. ആ പ്രണയസല്ലാപ ദൃശ്യങ്ങൾ മറ്റുപലരിലും പ്രണയം വിരിയാൻ പ്രേരണ പോലും നൽകി. 

കോറിഡോറുകളും ലാബും ആരും കേറാത്ത റെഫെറൻസ് ലൈബ്രറിയും കാന്ടീനിലെ തെക്കു പടിഞ്ഞാറു മൂല ...നമ്മുടെ നാഗവല്ലി പറഞ്ഞപോലെ മാന്തോപ്പിലേക്കു തുറക്കുന്ന ജനാലകളുള്ള കാന്ടീനിലെ ഭാഗവും പിന്നെ കോളേജ് കുട്ടികളുടെ നിവേദനം ഒന്നുകൊണ്ടുമാത്രം അതുവഴിയുള്ള KSRTC യുടെ ചില ഷെഡ്യൂളുകളും അവർക്കായി തുറന്നിട്ടിരുന്നു.

കാഴ്ച്ചയിൽ സുന്ദരിയായ മീരയും വെളുത്തുകൊലുന്നനെ അലസമായി പാറിപ്പറക്കുന്ന മുടികളുമുള്ള … ശരത്തും ഞങ്ങൾക്ക് ആദ്യം കൗതുകം പരത്തിയിരുന്നു. പലതവണ ഉപദേശ ശരങ്ങൾ കൊണ്ടിട്ടും എന്നെ തെല്ലേണ്ടമ്മവാ എന്ന അവരുടെ മനോഭാവം ഒടുവിൽ എല്ലാരും തിരിച്ചറിഞ്ഞു...

ബിരുദ പരീക്ഷയുടെ ചൂടിൽ പഞ്ചാര ഉരുകി ഒളിച്ചോ എന്നൊന്നും ആരും അന്വേഷിച്ചില്ല.

പരീക്ഷാക്കാലം……ഉപദേശം...കുട്ടികളുടെ ഭാഷയിൽ പറഞ്ഞാൽ മുടിഞ്ഞ ഉപദേശം. അഫ്‌റ്റർനൂൺ ക്ലാസുകളിൽ മിക്കവാറും ഡിപ്പാർട്മെൻറ് ഹെഡിന്ടെ വക ഭാവിയെ ഭൂതമാക്കൻ കെൽപ്പുള്ള ഉപദേശ ബോംബുകൾ വർഷിച്ചിരുന്നു. അന്ന്. മുകേഷ് ഖന്ന യുടെ മെഗാ സീരിയൽ ശക്തിമാൻ തലയ്ക്കു പിടിച്ചിട്ടാണോ എന്നറിയില്ല ശക്തിമാനും അത് തന്നെ “ജ്വാലയായി” എന്ന് തുടങ്ങുന്ന ദൂരദർശനിലെ ഉച്ച സീരിയലുകളുടെ നിലവിളി സമീപത്തുള്ള വീടുകളിൽ നിന്ന് ഒഴുകി എത്തുമായിരുന്നു. ഇടയ്ക്കിടയ്ക്ക് ഒന്ന് ഉണർത്തിവിടാൻ എന്തുകൊണ്ടും സംവിധായകൻ വയലാർ മാധവൻകുട്ടി സാറിന് സാധിച്ചിരുന്നു എന്നുള്ളതാണ് കാലം ഇത്ര കടന്നു പോയിട്ടും കുളിരു വാരിവിതറുന്നത്.

ബിരുദപഠനം ഒന്ന് കൊണ്ട് പോലും ഒരു “പാഠം പഠിക്കാത്ത” ഞങ്ങൾ മൂവർ ക്യാമ്പസ്സിൽ ഒരേ ക്ലാസിൽ ഉപരിപഠനത്തിനു ചേരുന്നു. ഭാഗ്യമാണോ നിർഭാഗ്യമാണോ എന്ന് ഇതുവരെ വ്യക്തമാക്കപ്പെട്ടിട്ടില്ല.

ബോറൻ ലൈബ്രറികൾ-അതിൽ നിറം മങ്ങിയ പടച്ചട്ടയോടുകൂടിയ പഴയ തടിയൻ ഡെസേർട്ടഷൻസ്-മാതൃക ചോദ്യാവലികൾ, കമ്മ്യൂണിറ്റി ഔട്ട്റീച് സെക്ഷനിലെ ഒന്നുടെ നിർത്തി ചോദിച്ചാൽ നാട്ടുകാരുടെ അടി കിട്ടാൻ ഉറപ്പുള്ള ദയനീയമായ ഫൈൻഡിങ്‌സ് എന്നിവ ഗമയിൽ ബൈൻഡ് ചെയ്തിരിപ്പുണ്ട്. ഓരോ ബാച്ചിലും വന്നു കൂടുന്ന പിള്ളേരുടെ സ്ഥിരം വേട്ട മൃഗം ആണല്ലോ ക്യാമ്പസ്സിന് തൊട്ടടുത്ത് കിടക്കുന്ന വാർഡിലെ ജനങ്ങൾ. മനുഷ്യത്തം കാരണം മാത്രം അവർ മോശമായി പ്രതികരിക്കകുന്നില്ല എന്നെ ഉള്ളു.

അങ്ങനെ ത്രിശങ്കു സ്വർഗത്തിൽ ഇരിക്കുന്ന ഏതോ ഒരു ഉച്ചയാമത്തിൽ ആണ് പ്യൂൺ ചേട്ടൻ റൂമിൽ വന്നു പറഞ്ഞത് വിസിറ്റർ ഉണ്ടെന്നു.

ഞങ്ങളെ തികച്ചും അത്ഭുതപ്പെടുത്തിക്കൊണ്ട് ഒരു രാഷ്ട്രീയകാരന്ടെ അതോ ബിസിനസ്കാരന്ടെയാണോ അഹ്!! രണ്ടും ഏറെക്കുറെ ഒന്നാണല്ലോ പാറിപ്പറക്കുന്ന മുടിയഴകൾ ഇല്ല, ഇംഗ്ലീഷ് അക്ഷരമാലയിലെ ചെറിയ ലെറ്റർ b യെ ഓർമ്മിപ്പിച്ചുകൊണ്ടുള്ള വയറും ഒക്കെ ആയി (ബോഡി ഷെമിങ് എന്ന് ദയവു ചെയ്തു മുദ്ര കുത്തല്ലേ) അതെ അവൻ ….പഴയ ശരത്ത്.... പക്ഷെ കൂടെ മീരയെ പ്രതീക്ഷിച്ച ഞങ്ങൾ കണ്ടത് അവളുടെ കൂട്ടുകാരി സീനത്തിനെ.

"നിങ്ങൾ ഞെട്ടി അല്ലെ ബഡീസ്" എന്നുള്ള അവന്ടെ തനതു ശൈലിയിലുള്ള ചോദ്യം ....."ഞാനും ഞെട്ടി ഇരിയ്ക്കുവാടെ" അബുദാബിക്കാരൻ പുതുമണവാളൻ ആവാൻ ചാടി പുറപ്പെട്ടതായിരുന്നു ഇപ്പൊ രണ്ടു വീട്ടിലും സ്വാഹാ. കല്യാണം രജിസ്റ്റർ ചെയ്തു പണിയും കിട്ടി എന്നർത്ഥം.

ഒരു ദിവ്യ പ്രേമത്തിന്ടെ പരിസമാപ്തി കണ്ട ഞങ്ങൾ പൊടിപിടിച്ച ലൈബ്രറിയിൽ കേറാതെ തന്നെ അടുത്ത കൗൺസിലിങ് ഡെമോക്ക് വിഷയം കിട്ടിയ ആഹ്ളാദത്തിൽ തുള്ളിച്ചാടുകയായിരുന്നു.