വിഷുക്കണി
വിഷുക്കണി
മഞ്ഞക്കിളികൾ പാടുന്നൂ
കനവുകളിൽനിന്നും
മഴനൂലുകൾ ഭൂമിയിൽ വീഴുവാൻ,
കണിക്കൊന്നയിൽ
മഞ്ഞണിപ്പൂക്കൾ വിടരുവാൻ,
കാത്തിരിക്കുന്നൂ നമ്മൾ ഇഷ്ടതോഴർ... !
കണ്ണൻ മഞ്ഞപ്പട്ടാംബരംചുറ്റുവാൻ
കണ്ണിമയോലും
കാത്തിരിപ്പുണ്ടിവിടെ,
കാത്തുകാത്തങ്ങിരിക്കാം
വിഷുവരുന്നതും കാത്ത്
കണികണ്ടുണരുവാൻ,
നമ്മൾ ഇഷ്ടതോഴർ... !
വിഷുപ്പുലർച്ചക്കായ്, കാത്തിരിക്കാം
കണിക്കൊന്നപ്പൂക്കൾ
കൊഴിഞ്ഞുപോയെങ്കിലും,
മാമ്പൂക്കൾ മഞ്ഞില്ലാത്ത
കാലങ്ങളിൽ ഉരുകിക്കരിഞ്ഞു
പോയെങ്കിലും
കൊറോണക്കാലങ്ങളിൽ
നിമിഷങ്ങൾ കനച്ചുപോയെങ്കിലും,
കാത്തിരിക്കുന്നൂ നമ്മൾ ഇഷ്ടതോഴർ,
കണികണ്ടുണരുവാൻ!
മനസ്സിലൊരായിരം കൊന്നപ്പൂക്കളുമായി
പഴങ്ങളുടെ പഴങ്കെട്ടു ഭാണ്ഡവുമായ്
മഞ്ഞയാൽ ഐശ്വര്യത്തിൻ
പൂങ്കാവനം നിറയ്ക്കുവാൻ
കണികാണുവാനായ് നമ്മൾ
കാത്തിരിക്കുന്നൂ ഇഷ്ടതോഴർ,
കണികണ്ടുണരുവാൻ!