ಮಳೆಯೆಂಬ ಕವಯಿತ್ರಿ
ಮಳೆಯೆಂಬ ಕವಯಿತ್ರಿ
ಮಳೆಯೊಳಗೆ ನೆನೆಯಬೇಕು
ಮನಸ್ಸು ಹಗುರವಾಗುವವರೆಗು
ಇಳೆಯೊಳಗೆ ಕುಣಿಯುವ
ಮಳೆಯ ಸಂಗ ಮಾಡಬೇಕು
ಧರಣಿಯ ಕತ್ತಿಗೆ ಮಳೆಹನಿಯ ಮಾಲೆ
ವರುಣನ ಕೊಡುಗೆಯಲ್ಲದೆ ಮತ್ತೇನು...?
ಭುವಿಯ ಒಡಲೊಳಗೆ ಹಸಿರ ತುಂಬಿ
ನಳನಳಿಸುವಂತೆ ಮಾಡಿದ ಮಳೆ ಜಾದೂಗಾರನೆ ತಾನೆ??
ನಿಂತ ಹಳ್ಳ ಕೊಳ್ಳಗಳು ರಭಸದಿ ನದಿಯ
ಬೇಟಿಯಾಗಲು ಸಂಭ್ರಮದಿ ಹೊರಟಿವೆ
ಮುದುವೆಯ ದಿಬ್ಬಣವು ಹೊರಟಂತೆ
ಕೆಂಬಣ್ಣದ ನೀರು ಹೋಳಿ ಆಡಿದಂತೆ
ಸಾಲು ಸಾಲು ಮರಗಳ ಮೈಯಲ್ಲಿ
ಮಳೆಹನಿಗಳ ಚಿತ್ತಾರ ಚಂದಗಾಣಿಸಿದೆ ನಿಸರ್ಗವ
ಎಲೆ ಹೂಗಳು ಮಿಂದು ಕುಳಿತಿವೆ
ಎಲ್ಲೋ ಹೊರಡಲು ಅಣಿಯಾದಂತೆ
ದುಂಬಿ ಜೇನುಗಳು ಮಳೆಯಲಿ ಆಡುತಿವೆ
ಹೊಸದಾದ ಪದ್ಯವ ಸೃಷ್ಟಿಸಿ ಹಕ್ಕಿಗಳು ಹಾಡುತಿವೆ
ಮಳೆಯೊಡನೆ ಬೆರೆತು ತಂಪಾದಳು ಧರಿತ್ರಿ
ನಾಚಿ ನಿರಾಗಿ ಶೃಂಗಾರ ಕಾವ್ಯವ ಬರೆದಳು
ಹಾಗಾದರೆ ವಸುಂಧರೆ ಕೂಡ ಒಬ್ಬ ಕವಯಿತ್ರಿ!!?
ಮಳೆಯಲಿ ನೆನೆಯಬೇಕು
ಮಳೆಯೊಳಗೆ ಸೇರಿಬಿಡಬೇಕು!