ಬಾಲ್ಯದ ಮಳೆಯಾಟ

ಕಾಗದದ ದೋಣಿಯನ್ನು ಮಾಡಿ

ಕೆರೆಯೊಳಗೆ ಮಳೆ ಹೊಯ್ಯುವಾಗ

ತೇಲಿಬಿಡುವ ಆ ಆಟ ಚೆನ್ನಾಗಿತ್ತು

ಮಳೆಗಾಲದ ಜೂನಿನ ಸಮಯದಿ

ಧರೆಯ ಮೇಲಿನ ಹುಲ್ಲಿನ ನೀರನು

ಕಣ್ಣಿಗೆ ಬಿಟ್ಟುಕೊಂಡಾಡುವ ಆ ಆಟ ಚೆನ್ನಾಗಿತ್ತು

ಪಾಚಿಗಟ್ಟಿದ ನೆಲದ ಮೇಲೆ

ಬೇಕೆಂದೆ ಕಾಲಿಟ್ಟು ಜಾರಿ ಬೀಳುತಲಿ

ಮತ್ತದನೆ ಪುನಾರಾವರ್ತಿಸುವ ಆ ಆಟ ಚೆನ್ನಾಗಿತ್ತು

ಮಳೆಯೊಡನೆ ಬರುವ ಗಾಳಿಗೆ

ಛತ್ರಿಯು ಹಾರಿ ಮೇಲಾಗಿ ಕಡ್ಡಿ ಮುರಿದು

ಬೆಂಡಾದ ಛತ್ರಿಯ ಜೊತೆ ಆಡುತ್ತಿದ್ದ ಆ ಆಟ ಚೆನ್ನಾಗಿತ್ತು

ಮಳೆಗಾಲದಿ ಮನೆಯೊಳಗೆ ಬೆಚ್ಚಗೆ ಕುಳಿತು

ಚೆನ್ನೆಮಣೆಯ , ಪಗಡೆ, ಕಣ್ಣಾಮುಚ್ಚಲೆ, ಜೂಟಾಟ

ಗೆಳತಿಯರ ಜೊತೆಯಲಿ ಆಡುತ್ತಿದ್ದ ಆ ಆಟ ಚೆನ್ನಾಗಿತ್ತು

ಶಾಲೆಯಿಂದ ಮನೆಗೆ ನಡೆದು ಬರುವಾಗ

ಕಾಲಿಗೆ ಮೈಗೆ ಕಚ್ಚಿದ ಇಂಬಳಗಳ ನೋಡಿ

ಒಂದೊಂದನೆ ಹುಡುಕಿ ತೆಗೆದು ಹಾಕುವ ಆ ಆಟ ಚೆನ್ನಾಗಿತ್ತು

ಮನಸ್ಸಿನ ಕೊಳೆ ತೊಳೆವ ಶಕ್ತಿ ಮಳೆಗೆ ಮಾತ್ರ ಇದೆ

ಹೌದು ..!! ಬಾಲ್ಯದ ಮಳೆಯಾಟವೇ ಚೆನ್ನಾಗಿತ್ತು

ಹೊರಗೆ ಸುರಿವ ಮಳೆಗೆ ಬಾಲ್ಯವೇಕೋ ನೆನಪಾಯಿತು.