ಮಳೆ

ಆಗಸದಿ ಕಾರ್ಮೋಡ ಶೃಂಗಾರವು ಭುಮಿಯ ಭಯ ಪಡಿಸಲು

ಅಂಬರದಿ ಗುಡುಗಿನ ಸದ್ದು ಪರಿಸರವ ನಡುಗಿಸಲು

ಬಾನಿಂದ ದಾರಿಗೆ ಚಿಮ್ಮಿತು ಮುತ್ತಿನ ಹನಿಯ ಸ್ಪರ್ಶ

ಇಡೀ ಪರಿಸರದ ತುಂಬಾ ಮೂಡಿತು ಹರ್ಷ 

ಮೊದಲ ಮಳೆಗೆ ಇಳೆಯಾಯಿತು ತಂಪು

ಎಲ್ಲೆಲ್ಲೂ ಮಣ್ಣಿನ ಸೊಗಡಿನ ಕಂಪು

ಮಕ್ಕಳಿಗಂತೂ ದೋಣಿ ಬಿಡುವ ಆತುರ

ಅದು ಹೇಗೆ ಮುಂದೆ ಸಾಗುತ್ತದೆ ಎಂಬ ಕಾತುರ

ಮಳೆಯಲ್ಲಿ ನೆನೆಯುವುದೇ ನನಗೊಂದು ಹಬ್ಬ

ಆಗ ಅಮ್ಮ ಅಂಗಳಕ್ಕೆ ಬಂದರೆ ಅಯ್ಯೋ ಅಬ್ಬಬ್ಬಾ

ಬೀಳುತ್ತಿತ್ತು ಬಿಸಿಬಿಸಿ ಕಜ್ಜಾಯ

ಈಗಲೂ ಆ ನೆನಪೇ ನನ್ನೊಳಗೆ ಸದಾ ತನ್ಮಯ

ಅಮ್ಮ ಮಾಡಿದ ಪೋಡಿ ಚಹಾದ ರುಚಿ

ಮಳೆಗಾಲದಲ್ಲಿ ಇಮ್ಮಡಿಯಾಯಿತು ಆ ರುಚಿ

ಕೆಂಡದಲ್ಲಿ ಸುಟ್ಟ ಗೆಣಸಿನ ಸವಿಯುವ ಬಾಯಿ

ಧನ್ಯೋಸ್ಮಿ ನಿನಗಿದು ನನ್ನಯ ತಾಯಿ