ಹರಿದುಹೋದ ಹಾಳೆಯಲ್ಲಿ.....

ಹರಿದುಹೋದ ಹಾಳೆಯಲ್ಲಿ ಪದಗಳ ಹೋರಾಟವು ಜೋರಾಗಿಯೇ ಸಾಗಿದೆ

ಏನನ್ನೋ ಹೇಳಹೊರಟ ಸಾಲುಗಳು ಅಲ್ಲಲ್ಲಿ ಮುರಿದುಹೋಗಿವೆ

ಜಾಗವು ಸಾಲದಾಗಿ ಒಂದಕ್ಕೊಂದು ಡಿಕ್ಕಿಹೊಡೆದು ನಡುವಲ್ಲಿ ಬೀಳುತಿವೆ

ಆದರೂ ಮೇಲೆದ್ದ ಶಬ್ದಗಳು ಛಲಬಿಡದೆ ಓಡುತಿವೆ

ಕಡುಕಪ್ಪು ಶಾಯಿಯ ಸಿಹಿಬೇಕೆಂದು ಬೆಳ್ಳಗಿನ ಪುಟಗಳ ಕರೆಬಂದಿದೆ

ಅವಸರದ ಕೈಒಂದು ಬೇಸರದ ಲೇಖನಿಯ ಹಿಡಿದು ಪುಟ್ಟಪುಟ್ಟ ಅಕ್ಷರಗಳನು ಜೋಡಿಸಿದೆ

ಅಮಾವಾಸ್ಯೆ ಕತ್ತಲಲ್ಲಿ ಭಾವನೆಗಳ ದೀಪವು ಕಾಲ್ಪನಿಕ ಯುದ್ಧಕ್ಕೆ ಸಾಕ್ಷಿಯಾಗಿದೆ

ಕತ್ತಿ ಗುರಾಣಿಗಳಿಲ್ಲದ ಯುದ್ದದಲ್ಲಿ ಪದಗಳ ಸಂಕಲನವು ಹೊಸದಾದ ಸಂಚಲನವನು ಸೃಷ್ಟಿಸಿದೆ

ಹೋತುಗೊತ್ತಿರದ ಬಯಕೆಗಳು ಒತ್ತಕ್ಷರವು ಬೇಕೆಂದು ಆಜ್ನ್ಯಾಪಿಸಿದೆ

ಎಂದಿಗೂ ಕತ್ತಲಾಗದ ಬಣ್ಣಗಳ ಊರಿನಿಂದ ಬಣ್ಣನೆಗಳ ಬೇಡಿಕೆಯು ಬಂದಿದೆ

ಅಲ್ಲಲ್ಲಿ ಹರಿದುಹೋದ ಹಾಳೆಯ ಮಡಿಲಿನಲ್ಲಿ ಮುದ್ದಾದ ಪದಗಳು ಜನಿಸಿವೆ

ಲೇಖನಿಯ ಗೂಡಬಿಟ್ಟ ಪದಗಳು ಬದಲಾವಣೆಯ ಬಾನಿನಲ್ಲಿ ಹಾರಲಿಚ್ಚಿಸಿವೆ