ಗಜಲ್

ಧ್ಯಾನದಲ್ಲಿ ಕುಳಿತು ದ್ವೇಷದ ದಳ್ಳುರಿಯಲ್ಲಿ ಬೇಯುವವರನ್ನು ಏನೆಂದು ಕರೆಯಲಿ

ಮಾತಿನಲ್ಲೇ ಮನಸ್ಸು ಕೆಡಿಸುವ ಕಾಯಿಲೆ ಇರುವವರನ್ನು ಏನೆಂದು ಕರೆಯಲಿ

ಮನೆಗೆ ಮಾರಿ ಊರಿಗೆ ಉಪಕಾರಿ ಗಾದೆ ಮರೆತು ಹೋದ ಸಂಭ್ರಮ ನಿನಗಿದೆ

ಕಾದ ಕಬ್ಬಿಣಕ್ಕೆ ಬಿಸಿನೀರು ಸುರಿದು ತಂಪು ಮಾಡುವವರನ್ನು ಏನೆಂದು ಕರೆಯಲಿ

ಸಾವಿಗೂ ನರಕ ತೋರಿಸುವ ವಿಶಾಲ ಹೃದಯ ಶ್ರೀಮಂತಿಕೆ ಮರೆಯಲಾಗದು

ಬರೆದ ಪದಗಳಿಗೆ ಮುಖವಾಡ ತೊಡಿಸಿ ಮೆರೆಯುವವರನ್ನು ಏನೆಂದು ಕರೆಯಲಿ

ಕಣ್ಣಿದ್ದೂ ಕುರುಡರಂತೆ ನಟಿಸುವ ಕಲೆಯ ದುಬಾರಿ ಬಳುವಳಿ ಕೊಟ್ಟಿದ್ದಾರೆ ನಿನಗೆ

ಕಣ್ಣ ಹನಿ ಸುರಿಸಿ ವಿಷ ಕಕ್ಕಿ ಕುರ್ಬಾನಿ ಆಗುವವರನ್ನು ಏನೆಂದು ಕರೆಯಲಿ

ಸ್ನೇಹಕ್ಕೂ ಸಮರ ಸಾರಿ ಕತ್ತಿ ಮಸೆಯುವ ಜನರಿದ್ದಾರೆ ಎಚ್ಚರ ‘ಲಕ್ಷ್ಮೀಶ’

ಲೇಖನಿ ಮುಳ್ಳಿಂದ ಚುಚ್ಚಿ ಸುಳ್ಳನ್ನು ಸತ್ಯವೆನ್ನುವವರನ್ನು ಏನೆಂದು ಕರೆಯಲಿ