ನೋವು ಮರೆತ ಹೃದಯ

ಬಿಟ್ಟುಬಿಡಬೇಕಿದೆ ಮನಸ್ಸಿನ ಭಾವವನ್ನು

ಇದ್ದರೂ ಇಲ್ಲದಿದ್ದರೂ ಕನಸು

ಎಷ್ಟೋ ನೋವುಗಳು ಕರಗಿ ಹೋಗಿವೆ

ಬಂದರೂ ಬಾರದಿದ್ದರೂ ನಲಿವು

ಮೌನದ ಮೆರವಣಿಗೆ ಹೊರಟು ನಿಂತಿದೆ

ದಾರಿಯಲ್ಲಿ ಎಲ್ಲಾ ಭಿನ್ನ ವಿಭಿನ್ನ

ಅಚ್ಚೊತ್ತಿದ ನೆನಪುಗಳು ಕಾಡ್ಗಿಚ್ಚಂತೆ ಉರಿದಿವೆ

ಬಿಡದೆ ಸುರಿದ ಮಳೆಯ ನಡುವೆ

ಕತ್ತಲಿಗೂ ಬೆಳಕಿನ ಚಿಂತೆ ಕಾಣುವ ಭಯದಲ್ಲಿ

ಕಿಂಚಿತ್ತೂ ಕರುಣೆ ಇರದ ನೆರಳ ನಡುವೆ

ಸುರಿದ ಸಾವಿನ ದಾರಿಯಲ್ಲಿ ಬದುಕೇ ಸೂತಕ

ಕನಸಿನ ಭಾವ ಮರೆತಿದೆ ನೋವಿನ ಜೊತೆಗೆ

ಹೋಗಿಬಿಡಲಿ ಎಲ್ಲವೂ ಮತ್ತೆ ಇನ್ನೆಲ್ಲವೂ

ಛಾಯೆಯೊಂದು ಮೂಡುವ ಮುನ್ನ

ನಕ್ಕುಬಿಡಲಿ ನೋವುಂಡ ಹೃದಯ ಇನ್ನಾದರು

ನೆನಪುಗಳು ಉರಿದು ಬೂದಿಯಾಗೋ ಮುನ್ನ