ಒಲವಿನ ಬೆಳಕು
ಒಲವಿನ ಬೆಳಕು
ಬೆಳಕಿನ ಹಬ್ಬ ಒಲವಿನ ಬೆಳಕು ಚೆಲ್ಲುತಿರಲಿ
ಮೈಗೊಡವಿ ಅಂಧಕಾರ ದೂರ ತೊಲಗಲಿ
ಅಜ್ಞಾನ ತೊಡೆದು ಜ್ಞಾನ ದೀವಿಗೆ ಹಚ್ಚುತಿರಲಿ
ಸಂಬಂಧಗಳ ಬಂಧಕೆ ನವಸ್ಪರ್ಶ ಸದಾ ತುಂಬಿರಲಿ
ಋತುಕಾಲದ ಮಂಕುತನ ಸರಿಸಿ ದೀಪಗಳು ಬೆಳಗಲಿ
ಭಾವ ಬಿರಿದು ಸೇತುವೆ ಬೆಸೆದು ಬಾಂಧವ್ಯ ಬಿಗಿಯಾಗಲಿ
ಮಾನವ ಚೈತನ್ಯಕೆ ಪ್ರಕೃತಿ ನಮ್ಮ ಜೊತೆಯಾಗಿರಲಿ
ಕತ್ತಲ ಬಸುರಿಗೆ ಬೆಳಕಿನ ಕಿರಣ ಹೆತ್ತ ಜ್ಯೋತಿಯಾಗಲಿ
ಸಮರಸದ ಬೆಳಕು ಹರಿದು ಸೊಗಸಿನ ಬದುಕು ಸಾಗಲಿ
ಮತಬೇಧ ತೊರೆದು ನಲಿವ ಜೀವನ ನಮ್ಮದಾಗಲಿ
ಸಗ್ಗದ ಸಂಭ್ರಮ ತುಂಬಿ ಜೀವಭಾವ ನೆಲೆಯಲಿ
ದೀಪದ ರಂಗವಲ್ಲಿ ಎಲ್ಲೆಡೆ ಹರಡಿ ಬೆಳಕ ಹೂವ ಚೆಲ್ಲಲಿ
ಕಾಲಚಕ್ರ ಉರುಳಿ ಬದುಕಿನ ಹೊಸತನ ರೂಪುಗೊಳ್ಳಲಿ
ಬಾಳಿನ ಸೆಲೆಯಾಗಿ ಬೆಳಕು ನಮ್ಮ ಜೊತೆ ಸೇರಲಿ
ಒಲವಿನ ರಾಶಿ ತುಂಬುತ್ತಾ ಮಮತೆಯ ಮಡಿಲಾಗಲಿ
ಭಕ್ತಿಯ ಸಿಂಚನವಾಗಿ ಹಬ್ಬದ ಗರಿಮೆ ಸದಾ ಮಿಂಚಲಿ