ತದಡಿ ಬಂದರಿನ ಸುತ್ತ ..........

ಗೋಕರ್ಣದಿಂದ ಎರಡು ಕಿಲೋಮೀಟರ್ 

ದೂರದ ಸಾಣೆಕಟ್ಟೆಯ ತಿರುವಿನ 

ತದಡಿ ರಸ್ತೆ ,

ಆ ರಸ್ತೆ ಇಬ್ಬರಿಗೂ ಚಿರಪರಿಚಿತ 

ಕಿತ್ತುಬಿದ್ದ ಹಳ್ಳ ದಿಣ್ಣೆಗಳೂ ಸಹ 

ಜೊತೆಗೂಡಿ ನಡೆಯುತ್ತಿದ್ದಾಗ 

ಒಮ್ಮೊಮ್ಮೆ ಮುಗ್ಗರಿಸುವುದು ಸಹಜ !

ರಸ್ತೆಯ ಪಕ್ಕ ಆಳೆತ್ತರಕ್ಕೆ ಬೆಳೆದ 

ಆ ತೆಂಗಿನ ಮರಗಳೂ 

ಆಗಾಗ ನೀಗಿಸಿದ್ದವು ದಾಹ 

ತೋಪಿನ ಅಂಚಿಗೆ ಕಡಲ ಕಿನಾರೆ ( ತದಡಿ ಬಂದರು )

ಉದ್ದಕ್ಕೂ ಗುಳ್ಳೆ ಗುಳ್ಳೆ ನೊರೆ 

ಒಂದಕ್ಕೊಂದು ಎತ್ತರಿಸಿ ಬರುವ ತೆರೆ 

ಅಲೆಗಳ ಮೇಲೆ ತೇಲಿಬರುವ ದೋಣಿ 

ಕಣ್ಣಳತೆಯಲ್ಲಿ ಕಣ್ಣುಮುಚ್ಚಾಲೆ 

ಸೂರ್ಯಾಸ್ತದವರೆಗೂ ಅದೇ ನಮ್ಮ ಬಯಲು 

ಅದೇ ಗಾಳಿ , ಮರಳು , ಅದೇ ಅಲೆಗಳು .....

ಹೇಳು ಈಗ ನೀನೆಲ್ಲಿ .....? ನಿನ್ನ ಗಂಧವೆಲ್ಲಿ ....?

ನಮ್ಮೊಡನೆ ಜೊತೆಯಾಗಿದ್ದ ಕಾಲವೆಲ್ಲಿ ...?

ನೀರೊಳಗೆ ಕೈಚಾಚಿ ಹಿಡಿದ ಉಸುಕೆಲ್ಲಿ ...?

ಹೇಗೆ ಜಾರುತ್ತಿತ್ತು ನಿನ್ನ ಮನಸ್ಸಿನಂತೆ ...

ಒಂಟಿಯಾಗಿ ಕುಳಿತುಕೊಂಡೆ 

ಆ ಹೆಬ್ಬಂಡೆ ಎದುರು 

ಅದರ ಕತೆಯೇ ಬೇರೆ 

ಬಂದರಿನ ಮೇಲೆ ಹಕ್ಕಿಗಳು ತಿರುಗುತ್ತಿವೆ 

ಅಲೆಗಳ ಮೇಲೆ ತೇಲುವ ಹತ್ತಾರು ಬೆಸ್ತ ನೌಕೆ 

ಈ ಕಡಲ ತಳದಲ್ಲಿರುವುದು 

ಏನು ಗೊತ್ತೇ ...? ಮುತ್ತಲ್ಲ ....

ಮೇಲೇಳದೆ ಬಚ್ಚಿಟ್ಟುಕೊಂಡ ಒಳಗುದಿ 

ಕಾಯುತ್ತಿರಬೇಕು ಅದೂ ಕಾಲಕ್ಕೆ 

ತನ್ನೊಡಲೊಳಗಿರುವುದನ್ನು ತೋಡಿಕೊಳ್ಳುವುದಕ್ಕೆ .....!