ಒಂದು ನಿವೇದನೆ .....

ನಿನ್ನ ಹೃದಯದಲ್ಲಿ ಬಚ್ಚಿಟ್ಟುಕೊಂಡ

ನೋವಿನ ಮೂಟೆಯನ್ನೊಮ್ಮೆ ಬಿಚ್ಚಿಬಿಡು

 ಅಂಗಳದ ತುಂಬಾ ಚದುರಿಬಿದ್ದ

ಹೂ ಹೆಕ್ಕುವಂತೆ

ಒಂದಿಷ್ಟು ಆರಿಸಿಕೊಳ್ಳುತ್ತೇನೆ

ನಗುವ ಮುಖದ ಹಿಂದಿರುವ

ನೋವಿನ ಗೆರೆಗಳಲ್ಲಿ

ಒಂದು ಚೂರು ನೋವಾದರೂ

ಕಡಿಮೆ ಆಗಲಿ

ಹತ್ತಿ ಉರಿಯುವ ಹೃದಯದೊಳಗೆ

ಪ್ರೀತಿಯ ಬೀಜ ಮೊಳಕೆಯೊಡೆದು

ಹಂಚುವ ನಿನ್ನ ಪರಿ ಅನನ್ಯ !

ಅದರಲ್ಲೊಂದು ಪಾಲು ಪಡೆದ

ನಾನೇ ಧನ್ಯ !

ನಿನ್ನ ಫಳ ಫಳ ಹೊಳೆಯುವ ಕಣ್ಣುಗಳಲಿ

ಮಿನುಗುವ ನಕ್ಷತ್ರಗಳನು ಎಣಿಸಲು

ನಾ ಬಯಸುವುದಿಲ್ಲ

ಆದರೆ , ನೋವಿನ ಮಧ್ಯದಲ್ಲೊಂದು

ಕೋರೈಸುವ ಮಿಂಚಿನ ಬೆಳಕನ್ನು

ಕಾಣಲು ತವಕಿಸುತ್ತೇನೆ

ಹೃದಯದಾಂತರ್ಯದಿಂದ ಬರುವ

ಭಾವನೆಗಳಿಗೆ ಬೇಲಿಕಟ್ಟಿ

ನಾಳೆಯ ಕನಸುಗಳಿಗೆ

ತಡೆಯೊಡ್ಡಿ ಸಾಯಿಸಬೇಡ

ಭಾವನೆಗಳ ಭಾರ ಹೊರಲು

ಕನಸುಗಳು ಚೂರಾಗದಂತೆ

ಜೋಪಾನ ಮಾಡಲು ನಾನಿದ್ದೇನೆ 

ನಿನ್ನ ಪುಟ್ಟ ಹೃದಯವನು

ನನಗೆ ಕೊಟ್ಟುಬಿಡು

ಅದನ್ನು ಎಂದಿಗೂ ನೋವಾಗದಂತೆ ಕಾಪಾಡುತ್ತೇನೆ