ಪುಟ್ಟ ಹಕ್ಕಿ
ಪುಟ್ಟ ಹಕ್ಕಿ
...................
ಊರ ಮುಂದಿನ ಬಯಲಿನಲ್ಲಿ
ಆಳೆತ್ತರಕ್ಕೆ ಬೆಳೆದ ಮರದ
ತುತ್ತ ತುದಿಯಲ್ಲಿದ್ದ
ಪುಟ್ಟ ಹಕ್ಕಿಯೊಂದು
ನನ್ನ ಮನದೊಳಗಿನ ಬಿಂಬವಾಯ್ತು
ಗೂಡು ಕಟ್ಟಿತು , ಸ್ವಚ್ಛ ಮಾಡಿತು
ಆದರೆ ಅದು ಮಾತನಾಡದು
ಹಾಡಲಾರದು , ಕೈಗೆಟುಕುವುದನ್ನು ಹೆಕ್ಕಲಾರದು
ತನ್ನಷ್ಟಕ್ಕೆ ತಾನೇ ರೂಪ ತಾಳಿತು !
ಗಿಡದಲ್ಲಿ ಹೂವ ಅರಳಿಸುತ್ತದೆ
ಕಣ್ಣಿನ ಕಾಡಿಗೆ ತೀಡಿ
ರೆಪ್ಪೆ ನೆರಳಿನಲ್ಲಿ
ನಗೆಯನ್ನು ತಿದ್ದಿಕೊಡುತ್ತದೆ
ತುಟಿಗೊಪ್ಪುವ ಬಣ್ಣದ ತೋರಣ ಕಟ್ಟಿ
ಒರಟಾದ ಕೈ
ಬಲವಾಗಿ ಹಿಡಿದಾಗ
ಕೆನ್ನೆ ತುಂಬಾ ಜೇನು ಹನಿಸಿ
ಗಲ್ಲಕ್ಕೆ ಕೈಯಾನಿಸಿ
ಮೌನವಾಗಿ ಕಥೆಯೊಂದ ಹೇಳುತ್ತದೆ !
ಇಂಥದೊಂದು ಹಕ್ಕಿ
ನಿಮ್ಮಲ್ಲಿಯೂ ಇದೆಯೇ ?
ಮಾತನಾಡಿಸಿ , ಹಾಡೊಂದ ಹಾಡಿಸಿ
ಮುತ್ತ ನೀಡಿ , ಪ್ರೀತಿ ಮಾಡಿ
ಕನಸುಗಳಿಗೆ ಹಚ್ಚಿಕೊಡಿ ಬಣ್ಣ
ಅದು ಬಲಿತು ಹಾರಾಡಲಿ
ಬಣ್ಣ ಬಣ್ಣದ ರಥವೇರಿ
ಜಾತ್ರೆ ಕಲೆತು ನಲಿಯಲಿ ....