ಬೆಳಿಗ್ಗೆ ಕಂಡಿದ್ದು ...

ಬೆಳ್ಳಿ ಮುಂಜಾವಿನಲಿ 

ಮಂದ ಮಾರುತ ಬೀಸುವಾಗ 

ರಂಗು ರಂಗಿನ ಸೂರ್ಯನ ಕಿರಣ 

ಒದ್ದೆ ಎಲೆಯ ಮೇಲೆ ಬಿದ್ದಾಗ 

ಇರುಳ ಸರಿಸಿ 

ಉಷೆ ಕಾಲಿಟ್ಟರೂ 

ಮಂಜು ತೆರೆ ಸರಿಸದ ಪ್ರಕೃತಿ ....!

ನಾಚಿ ನೀರಾಗಿದೆ ಇಳೆ 

ಮುಸುಕು ಹೊದ್ದು ಇನ್ನೂ ....!

ಯಾಕಿಷ್ಟು ನಾಚಿಕೆ ?

ತುಂಟ ರವಿ ಕುಡಿನೋಟದಿಂದಲೇ 

ಮೇಲು ಪರದೆಯ 

ಮೆಲ್ಲನೆ ಜಾರಿಸಿ 

ಪ್ರಕೃತಿಯ ಸಿರಿಮೊಗವ 

ನೋಡುವ ಉತ್ಕಟ ಬಯಕೆ .

ಆದರೆ ,

ಬೆಳ್ಳಂಬೆಳಗ್ಗೆ ಕಂಡಿದ್ದು 

ಮೆಲುಗಾಳಿಗೆ ಅತ್ತಿತ್ತ ಸುಳಿದಾಡುವ 

ಮುಂಗುರುಳ ಮಧ್ಯೆ 

ಸಾಲುಗಟ್ಟಿ ಹನಿವ 

ಇಬ್ಬನಿಯ ಮುತ್ತು ಸಾಲು !!

ಯಾರು ಪೋಣಿಸಿ ತೊಡಿಸಿದರು ....?

ಈ ಚೆಲುವಿಗೆ ಸಾಟಿ ಇಲ್ಲದ 

ಈ ಹಾರ ...?!