ಗಜಲ್

ಹಗಲು ಕಾಣದ ರಾತ್ರಿಗಳಲ್ಲಿ ನಿನ್ನ ಕಣ್ಣಿನ ಕಾಂತಿಯಾದರೂ ತುಂಬಿರಲಿ

ಇಲ್ಲವೇ ಅದೇ ರಾತ್ರಿಗಳಲ್ಲಿ ನಿನ್ನ ಒಲವಿನ ಬೆಳದಿಂಗಳಾದರೂ ತುಂಬಿರಲಿ

ಹುಣ್ಣಿಮೆ ಬರದಿದ್ದರೇನಂತೆ ಚೆಂಬೆಳಕು ನಿನ್ನ ಮೊಗದಲ್ಲಿಯೇ ತುಂಬಿದೆ

ನೋವಿಲ್ಲದ ಪ್ರೀತಿಗೆ ಸದಾ ಜೊತೆಯಿರುವ ನಿನ್ನ ನಗುವಾದರೂ ತುಂಬಿರಲಿ

ಸೋತರೂ ಗೆಲ್ಲುವ ದಿಕ್ಕಿಗೆ ಹೆಜ್ಜೆಯಿಟ್ಟು ಸಾಗೋಣ ಮನಸು ಮುರಿಯದಂತೆ

ಕನಸು ನನಸಾದಾಗ ಕೈಹಿಡಿದು ಜೊತೆಯಾಗುವ ಗಳಿಗೆಯಾದರೂ ತುಂಬಿರಲಿ

ಮೈಖಾನೆಯಲ್ಲಿ ಖಾಲಿ ಕನಸುಗಳು ನಿದ್ದೆಗೆಡಿಸುತ್ತಾ ಗಿರಕಿ ಹೊಡೆಯುತ್ತಿವೆ

ಕಣ್ಣಿಂದ ಜಾರಿದರೂ ಹನಿಯಲ್ಲಿ ನಿನ್ನ ಒಲವಿನ ಸನ್ನೆಯಾದರೂ ತುಂಬಿರಲಿ

ಮೌನ ಮನಸ್ಸಿಗೇನು ಗೊತ್ತು ಲಕ್ಷ್ಮೀಶನ ಒಲವಿನ ಅಂತರಂಗದ ಗುಟ್ಟು

ಪ್ರೀತಿಗಾಗಿ ಕಾಡಿ ಬೇಡದಂತೆ ಹಗಲಿನಲ್ಲಿ ನಿನ್ನ ಸನಿಹವಾದರೂ ತುಂಬಿರಲಿ